Në një takim urgjent bordi, drejtuesit e Nissan votuan në mënyrë unanime për shkarkimin e kryetarit të bordit dhe bosit të aleancës Renault-Nissan Carlos Ghosn.
Vendimi erdhi pas arrestimit të Ghosn më 19 Nëntor nga autoritetet Japoneze i akuzuar për evazion fiskal.
Ghosn i cili është lavdëruar si shpëtimtari i Nissan nga falimentimi, është duke u marrë në pyetje nga prokurorët e çështjes në Japoni.
Nissan është pjesë e aleancës me Mitsubishi dhe Renault ku Ghosn kishte shërbyer edhe si kryetar bordi i tre kompanive dhe CEO i Renault.
Edhe pse reagimi i kompanisë Japoneze ka qenë i menjëhershëm, Renault ka vendosur të presë rezultatet e hetimit përpara se të marrë një vendim.
Renault zotëron 43% të aksioneve të Nissan ndërsa kompania Japoneze vetëm 15% tek Francezët.
Në fund të viteve 90, Nissan ishte pranë falimentimit. Ghosn arriti me sukses të shpëtonte kompaninë duke blerë 36.8% të aksioneve ndërsa udhëhiqte Renault.
Në 2001 Nissan bleu pas 15% të aksioneve në Renault. Mitsubishi hyri në këtë aleancë pasi Nissan bleu 34% të aksioneve në 2016-ën. /Auto Ekspress
